buyanbileg 
Элсэлтийн ерөнхий шалгалт улс орон даяар хоёр дахь өдрөө үргэлжилж байна. Улсын хэмжээнд нийт 82 шалгалтын төв 9250 багш, боловсролын байгууллагын албан хаагчид ажиллаж байна.
Өчигдрийн байдлаар Монголын түүх, англи хэлний хичээлийн шалгалт явагдсан бол өнөөдөр хими, газар зүй, нийгэм судлалын хичээлээр шалгалт үргэлжилж байгаа юм.
Энэ удаагийн шалгалт “Ковид-19” халдварын үед болж байгаа учир шалгалтын байруудад тусгаарлах танхим бэлдэж, халдвар хамгааллын дэглэмийг сахиж, тусгай горимын дагуу явагдаж байгаа. Халдвартай сурагчдаас ирэх есдүгээр сарын 2-5-ны өдрүүдэд элсэлтийн шалгалтыг авах зохион байгуулалтыг хийсэн.
Монгол Улсын Ерөнхий сайд Л.Оюун-Эрдэнэ, Боловсрол, шинжлэх ухааны сайд Л.Энх-Амгалан нарын холбогдох хүмүүс өчигдөр 84 дүгээр сургуульд ажиллаж, шалгалтын нөхцөл байдалтай танилцлаа. Энэ үеэр Ерөнхий сайд танхимын сургалтыг тасалдуулахгүй байх том сорилт төр засаг, эцэг эхчүүд бидэнд байна гэдгийг онцлов.
Монгол Улсын Ерөнхий сайд болон БШУ-ны сайд нар элсэлтийн ерөнхий шалгалт өгч буй нийт төгсөгчдөдөө амжилт хүслээ.
