Боловсролын сайд П.Наранбаяр Математикийн олимпиадыг Монголд анх удаа зохион байгуулж байсан Монгол Улсын Гавьяат багш, МУБИС-ийн хүндэт профессор, доктор Г.Загдрагчааг хүлээн авч уулзлаа.
Өдгөө 92 насыг зооглож буй ч математикийн олимпиадынхаа тухай он, сартай нь ярих тэрбээр 1959 онд Олон улсын математикийн олимпиад /ОУМО/ анх Румынд болоход ажиглагчаар оролцож, 1964 онд Монгол Улсынхаа төлөөллийг оролцуулж явжээ. Улмаар 1965 онд Монголын Математикийн олимпиадыг анх зохион байгуулж, өнгөрсөн 60 жилийн хугацаанд ОУМО-ын найман алтан медальтантай болсон байна.
Тэрбээр “Математикийн цагаан толгой”, “Математикийн мэдлэг, чадварын түвшин шалгах сэдвүүд”, “Геометрийн батлах ба байгуулах бодлогууд”, “Математикийн жишиг даалгавар” зэрэг сурах бичгийг зохион гаргасан нь хүүхдүүд багаасаа математикт дурлахад ихээхэн хувь нэмэр оруулсан гэдгийг Боловсролын сайд П.Наранбаяр онцлон хэлж, талархал илэрхийлэв.
