Боловсролын яамны Төрийн нарийн бичгийн дарга Х.Батжаргал Монгол дахь НҮБ-ын Хүн амын сангийн тэргүүн Халид Шарифи тэргүүтэй төлөөлөгчдийг хүлээн авч уулзлаа. Уулзалтаар талууд 2025 онд хамтран ажиллах чиглэл, үйл ажиллагааны талаар санал солилцов.
Энэ жилийн хувьд цахим сургалтаар эрүүл мэндийн боловсролыг дэмжих, сургуулийн эрүүл мэндийн үйлчилгээг сайжруулах, сургууль болон дотуур байранд эрүүл, аюулгүй, хүний эрхийн зөрчилгүй орчин бүрдүүлэх чиглэлд голчлон анхаарахаа Монгол дахь НҮБ-ын Хүн амын сангийн тэргүүн Халид Шарифи хэллээ. Үүнтэй холбоотойгоор сурагчдын эрүүл мэндийн дэвтрийг бий болгож, цахимжуулах, шинээр бий болж буй Эрүүл мэндийн багш, арга зүйч хөтөлбөрийн сургалтад бэлгийн цогц боловсрол болон жендэрт суурилсан хүчирхийллийн тухай агуулгыг оруулах, дунд ангийн сургалтын хөтөлбөрийн шинэчлэлд техникийн туслалцаа үзүүлэн хамтарч ажиллах хүсэлтэй байгаа гэв.
Хэрэгжүүлж буй хөтөлбөрүүд, хамтран ажиллаж буй байгууллагуудын үйл ажиллагааны уялдаа холбоог хангахад анхаарна гэдгээ Боловсролын яамны Төрийн нарийн бичгийн дарга Х.Батжаргал хэлж, талууд сургуульд суурилсан эрүүл мэндийн үзлэг, сурагчдын сэтгэл зүйн эрүүл мэндийг дэмжихэд хамтран ажиллахаар тохиролцов.
Ташрамд, НҮБ-ын Хүн амын сангийн Улс орныг дэмжих VI хөтөлбөрийн хүрээнд 2017-2022 онд Боловсролын яам нь тус байгууллагатай хүний эрх, жендэрийн тэгш байдлыг хангасан амьдрах ухаан, бэлгийн цогц боловсролын хөтөлбөрийг хэрэгжүүлж, бодлогын орчныг сайжруулах чиглэлээр хамтран ажилласан. 2023-2027 онд Улс орныг дэмжих VII хөтөлбөрийн хүрээнд эрүүл мэндийн хичээлийн чанар, багшийн чадавхыг сайжруулах, сургуулийн сэтгэл зүйч, нийгмийн ажилтны бэлгийн болон нөхөн үржихүйн мэдлэгийг нэмэгдүүлэх, сургуулийн орчин дахь хүчирхийллийг бууруулж, таслан зогсоох, хүүхдийн бага наснаас эхлэн нөхөн үржихүй, бэлгийн боловсрол болон жендэрийн ойлголтыг насанд нь тохирсон хөтөлбөрөөр оруулах, хэвлэл мэдээллийн хэрэгслээр дамжуулан бүх нийтийн жендэрийн боловсролыг дээшлүүлэх зэрэг ажлуудыг хамтран хэрэгжүүлж байна.
