Боловсролын сайд П.Наранбаяр Японы “Күмон” Боловсролын Хүрээлэнгийн төлөөлөгчидийг хүлээн авч уулзлаа.
Хүрээлэнгийн стратеги төлөвлөлт, сурталчилгааны хэлтсийн дэд дарга Кентаро Миёоши “Күмон” сургалтын хөтөлбөрийнхөө талаар танилцууллаа. “Күмон” нь дэлхийн 63 оронд сургалтын үйл ажиллагаагаа явуулдаг агаад хүүхэд тус бүр дээр түвшинд нь тохирсон сургалтыг явуулж чадахаасаа эхлээд алхам алхамаар ахих ахицаар нь үнэлдэг онцлогтой аж.
Математикийн багш Күмоны нэрээр нэрлэсэн нь ч түүний заах арга зүй, сурганы системийг хөтөлбөртөө нэвт шингээсэнтэй холбоотой.
Боловсролын сайд П.Наранбаяр 11 дүгээр сард Япон улсад албан айлчлал хийх үеэрээ тус хүрээлэнгийн төлөөлөгчдийг Монголд урьж, "Күмон" хөтөлбөрийг манай орны хувийн хэвшилийн сургуулиудад танилцуулахыг хүссэний дагуу ирсэнд талархаж буйгаа илэрхийллээ.
Уулзалтын төгсгөлд "Күмон"-ы заах арга зүйг Монголд нэвтрүүлэх туршилтын төсөл хэрэгжүүлэх тухай Монгол Улсын Боловсролын яам, Япон Улсын "Күмон" боловсролын хүрээлэн хооронд харилцан ойлголцлын санамж бичгийг байгууллаа. Санамж бичигт Монголын талаас Боловсролын яамны Ерөнхий боловсролын газрын дарга М.Цогзолмаа, Японы талаас "Күмон" боловсролын хүрээлэнгийн стратеги төлөвлөлт, сурталчилгааны хэлтсийн дэд дарга Кентаро Миёоши нар гарын үсэг зурав.
