Билгийн тооллын 17 дугаар жарны хөхөгчин Могой жилийн цагаан сарын босгон дээр Монгол Улсын Их хурлын гишүүн, Боловсролын сайд П.Наранбаяр, Төрийн нарийн бичгийн дарга Х.Батжаргал болон удирдлагууд Боловсролын яаманд ажиллаж байсан үе үеийн ахмад ажилтнууддаа хүндэтгэл үзүүллээ.
Нийт 90 гаруй ахмадтайгаас 80- аад нь цугларсан байна. Хамгийн өндөр настай нь энэ жил 97 насыг зооглож байгаа Ю.Жавзан гуай юм. Тэр бээр төр нийгмийн зүтгэлтэн Ю.Цэдэнбал агсаны төрсөн дүү агаад хорь гарамхантайгаасаа багшилж эхлэн, улмаар тус яаманд арав гаруй жил ажиллажээ.
Боловсролын сайд П.Наранбаяр Монгол улсын боловсролын салбарыг хөгжүүлэх үйлст өөрийн залуу нас, мэдлэг чадвар, хүч хөдөлмөр, сэтгэл зүтгэлээ харамгүй зориулсан ахмадууддаа эрүүл энх, урт удаан насыг хүсэн ерөөж, ахмадуудынхаа мэдлэг оюун, туршлага, саналыг бодлого шийдвэртээ тусган ажиллахаа илэрхийллээ.
