Боловсролын яамны Төрийн нарийн бичгийн дарга Х.Батжаргал Лондон хотноо 2025 оны 02 дугаар сарын 26-ны өдөр зохион байгуулагдсан Монгол, Британийн Дугуй ширээний 15 дугаар уулзалтад оролцлоо. Дугуй ширээний уулзалтаар Талууд боловсролын салбарт хэрэгжүүлж буй Монгол-Британийн хамтын ажиллагааны талаар санал солилцож, Чевнингийн тэтгэлэгт хөтөлбөр болон Монгол Улсын Ерөнхийлөгчийн санаачилсан “Илгээлт 2100” тэтгэлэгт хөтөлбөрийн хүрээнд оюутан солилцоо идэвхтэй өргөжиж байгааг онцлон, тэтгэлгийг нэмэгдүүлэхээр ярилцав.
Британийн талаас англи хэлний сургалтыг үргэлжлүүлэн дэмжихээ илэрхийлж, Британийн Хилийн чанад дахь хөгжлийн тусламжийн шугамаар цахим платформд суурилсан англи хэлний сургалтыг ерөнхий боловсролын сургалтын хөтөлбөрт нэвтрүүлэх, англи хэлний сургалтын хөтөлбөрүүдэд монгол суралцагчдыг хамрагдах бололцоог нэмэгдүүлэх, Монгол Улсын ерөнхий боловсролын сургуулиудад хэрэгжүүлж буй англи хэлний сургалтын чанарыг сайжруулахад дэмжлэг үзүүлэхээ илэрхийллээ.
