Боловсролын сайдын тушаалын дагуу лам хуврагуудын ерөнхий боловсролын асуудлыг шийдвэрлэх цахим нөхөн олгох хөтөлбөр албан ёсоор хэрэгжиж эхэллээ. Тус хөтөлбөр нь буддын гүн ухаанд суралцаж буй Энэтхэг дэх лам хуврагууд болон алслагдсан сумдын сүм хийдэд суралцаж буй лам хуврагуудын боловсролын асуудлыг бүрэн шийдвэрлэх зорилготой юм.
Энэхүү хөтөлбөрийг Нийслэлийн ерөнхий боловсролын 112 дугаар сургуульд түшиглэн зохион байгуулж, цахим хичээлийн нээлтэд 200 орчим суралцагч болон Боловсролын яам, Боловсролын Ерөнхий Газар, Монголын Бурханы Шашинтны Төв – Гандантэгчэнлин хийдийн төлөөлөгчид оролцлоо.
Хөтөлбөрийн хүрээнд цахим сургалтыг ашиглан ерөнхий боловсролын хичээлүүдийг лам хуврагуудын хэрэгцээнд тохируулан хүргэж, уян хатан, хүртээмжтэй сургалтын орчин бүрдүүлж байна.
Хөтөлбөрийг хэрэгжүүлснээр:
• Энэтхэг улсад суралцаж буй лам хуврагуудын ерөнхий боловсрол мэдлэгийг цахимаар эзэмшүүлэх боломжтой болно.
• Алслагдсан бүс нутгийн сүм хийдэд суралцаж буй лам хуврагууд цахимаар боловсрол эзэмших боломжтой болно.
• Боловсролын тэгш хамруулах хүртээмжийг нэмэгдүүлэх, ялангуяа суралцахуйн ялгаатай хэрэгцээтэй суралцагчид, алслагдсан бүс нутагт амьдарч буй лам хүүхэд, залуус, буддын шашны сургалттай лам хуврагууд зэрэг боловсролын үйлчилгээ хүртэхэд хүндрэлтэй байгаа зорилтот бүлгийн хүмүүс чанартай боловсрол эзэмших боломжтой болно. Энэ нь тэдний мэдлэг, ур чадварыг дээшлүүлж, ирээдүйд нийгмийн тэгш оролцоог хангах, амьдралын чанарыг сайжруулахад чухал нөлөө үзүүлнэ.
Боловсролын салбар болон буддын шашны байгууллагуудын хамтын ажиллагааны үр дүнд хэрэгжиж буй энэхүү хөтөлбөр нь лам хуврагуудын боловсролын түшинг ахиулах, цаашдын хөгжлийг дэмжих чухал алхам юм.
