“СУРГУУЛИЙН ӨМНӨХ БОЛОВСРОЛЫН ҮЙЛЧИЛГЭЭНД ХАМРАГДАЖ БАЙГАА СУРАЛЦАГЧИЙН ХӨГЖИЛ БОЛОН СУРГУУЛЬД БЭЛТГЭГДСЭН БАЙДЛЫГ ҮНЭЛЭХ ЖУРАМ”-ын төсөлд санал авч байна.

“СУРГУУЛИЙН ӨМНӨХ БОЛОВСРОЛЫН ҮЙЛЧИЛГЭЭНД ХАМРАГДАЖ

БАЙГАА СУРАЛЦАГЧИЙН ХӨГЖИЛ БОЛОН СУРГУУЛЬД БЭЛТГЭГДСЭН БАЙДЛЫГ

ҮНЭЛЭХ ЖУРАМ”-ын төсөлд санал авч байна.

"Сургуулийн өмнөх болон ерөнхий боловсролын тухай" хуулийн 26.6-д “Энэ хуулийн 18.7-д заасан үнэлгээ хийх журмыг боловсролын асуудал эрхэлсэн Засгийн газрын гишүүн батална” гэж заасны дагуу “Сургуулийн өмнөх боловсролын үйлчилгээнд хамрагдаж байгаа суралцагчийн хөгжил болон сургуульд бэлтгэгдсэн байдлыг үнэлэх журам”-ын төслийг боловсруулан Захиргааны ерөнхий хуулийн 62.1 дэх заалтыг үндэслэн санал авч байна.

Журмын төсөлтэй танилцан саналаа Сургуулийн өмнөх боловсролын хэлтэс Б.Энхцэцэг enkhtsetseg@moe.gov.mn хаягаар ирүүлнэ үү.

Төсөл

СУРГУУЛИЙН ӨМНӨХ БОЛОВСРОЛЫН ҮЙЛЧИЛГЭЭНД ХАМРАГДАЖ

БАЙГАА СУРАЛЦАГЧИЙН ХӨГЖИЛ БОЛОН СУРГУУЛЬД БЭЛТГЭГДСЭН БАЙДЛЫГ

ҮНЭЛЭХ ЖУРАМ

Нэг.Нийтлэг үндэслэл

1.1.Өмчийн бүх хэлбэрийн хүүхдийн цэцэрлэг /цаашид “цэцэрлэг” гэх/-т хамрагдаж байгаа суралцагчийн хөгжил болон ерөнхий боловсролын сургуулийн нэгдүгээр ангид элсэх суралцагчийн сургуульд бэлтгэгдсэн байдлыг үнэлэхэд энэхүү журмыг баримтална.

1.2.Журмыг хэрэгжүүлэхэд Боловсролын ерөнхий хууль, Сургуулийн өмнөх болон ерөнхий боловсролын тухай хууль болон бусад холбогдох хууль дүрэм, журмыг мөрдөнө.

1.3.Суралцагчийн хөгжил болон сургуульд бэлтгэгдсэн байдлын үнэлгээ /цаашид “үнэлгээ” гэх/ нь тэдний бие бялдар, танин мэдэхүй, нийгэмшлийн хөгжилд гарч байгаа ахиц, өөрчлөлтийг илрүүлэх, хүрсэн үр дүнг тогтоох, багш мэргэжлийн ур чадвар, багшлах арга барилаа сайжруулах, сургалт, үйл ажиллагааг суралцагчийн онцлог хэрэгцээнд тохируулан төлөвлөж хэрэгжүүлэх үйлийг дэмжиж, сургуулийн өмнөх боловсролын чанар, үр дүнг сайжруулахад чиглэнэ.

1.4.Үнэлгээ нь суралцагчийн нас, хөгжлийн онцлог, авьяас, чадвар, сонирхол, ялгаатай хэрэгцээг харгалзсан, суралцах, хөгжих үйлийг дэмжсэн, баримт, нотолгоонд суурилсан, оролцоог тэгш хангасан, ялгаварлан гадуурхалт, хөндлөнгийн нөлөөллөөс ангид байна.

1.5.“Суралцагчийн хөгжлийн үнэлгээ” гэж сургалт, үйл ажиллагааны явцад суралцагчийн сурах үйл явцыг чиглүүлэх, тэдний бие бялдар, танин мэдэхүй, нийгэмшлийн хөгжилд гарч байгаа ахиц, өөрчлөлтийг илрүүлэх, хүрсэн үр дүнг тогтоох үнэлгээг ойлгоно.

1.6.“Сургуульд бэлтгэгдсэн байдлыг үнэлэх үнэлгээ” гэж тухайн онд зургаан нас хүрэх суралцагчийн сургуульд элсэн суралцахад шаардлагатай мэдлэг, чадвар, төлөвшлийн түвшнийг тогтоох үнэлгээг ойлгоно.

1.7.Үнэлгээний үр дүн нь сургалт, үйл ажиллагааны төлөвлөлтийг суралцагчийн хөгжлийн түвшин, ялгаатай хэрэгцээг харгалзан төлөвлөж хэрэгжүүлэх үндэслэл болно.

1.8.Хөгжлийн бэрхшээлтэй суралцагчийг үнэлгээнд хамруулахдаа энэ журам болон боловсролын асуудал эрхэлсэн Засгийн газрын гишүүний баталсан журам, аргачлалыг баримтална.

Хоёр. Суралцагчийн хөгжлийн үнэлгээ

2.1.Суралцагчийн хөгжлийн үнэлгээ нь гараа (оношлох)-ны, явцын, үр дүнгийн гэсэн гурван төрөлтэй байна.

2.2.Гарааны үнэлгээг хичээлийн жилийн эхэнд сургалт, үйл ажиллагааг эхлэхээс өмнө хийж, суралцагчийн мэдлэг, чадвар, төлөвшил, ялгаатай хэрэгцээг тодорхойлно.

2.2.1.Цэцэрлэгт шинээр элсэж байгаа бага бүлгийн суралцагчийг гарааны үнэлгээнд  заавал хамруулж хөгжлийн түвшнийг тогтооно.

2.2.2.Дунд, ахлах, бэлтгэл бүлэгт шинээр элссэн болон өмнөх хичээлийн жилийн үр дүнгийн үнэлгээ, дүгнэлтээс хамааран тэдэнтэй ажиллах арга зүй, технологийг тодорхойлох шаардлагатай суралцагчийг гарааны үнэлгээнд хамруулж болно.

2.2.3.Журмын 2.2.1, 2.2.2-т заасан гарааны үнэлгээг дараах хүснэгтэд заасан түвшинд баримжаалан хийнэ.

2.3.“Явцын үнэлгээ”-г сургалт, үйл ажиллагааны явцад дараах байдлаар хийнэ.

2.3.1.суралцагчийн суралцах үйлийг багш ажиглан тухайн нөхцөлд тохирсон хариу арга хэмжээ (арга зүйгээ өөрчлөх, сургалтын орчин, хэрэглэгдэхүүнийг тохируулах) авах;

2.3.2.суралцагчийн суралцах үйл явцад гарч байгаа ахиц, өөрчлөлтийг тандах ажиглалт, ярилцлагын тэмдэглэл хийх, хувийн хавтсыг тэдний ахицыг харуулсан бүтээлээр баяжуулах зэргээр баримт, нотолгоо цуглуулах;

2.3.3.энэ журмын 2.5.3-т заасан дүгнэлтэд үндэслэн багш сургалт, үйл ажиллагааны төлөвлөлт, арга зүй, орчин, хэрэглэгдэхүүнд шаардлагатай тохируулга хийх;

  2.3.4.мэргэжлийн багш нарын бүлэг журмын 2.5.3-д заасан нэгтгэлийг тухай бүр хэлэлцэн энэ журмын 2.3.3-т заасан тохируулга хийх талаар багшид арга зүйн дэмжлэг үзүүлэх;

2.4.Багшийн явцын үнэлгээ хийж буй байдалд цэцэрлэгийн эрхлэгч, арга зүйч нь ажиглалт хийж, өдөр тутмын сургалт, үйл ажиллагааны явцад мэргэжлийн зөвлөгөө, арга зүйн дэмжлэг үзүүлж хамтран ажиллана.

2.5.“Үр дүнгийн үнэлгээ”-гээр суралцагч тухайн насанд эзэмшвэл зохих агуулгыг бүрэн эзэмшсэн эсэхийг үнэлж, цаашид сургалт, үйл ажиллагааны төлөвлөлт, хэрэгжилтэд анхаарах шаардлагатай асуудлыг тодорхойлно.

    2.5.1.Үр дүнгийн үнэлгээг дараах шалгуураар үнэлнэ.

2.5.2.Үр дүнгийн үнэлгээг бүлгийн хэмжээнд багш, цэцэрлэгийн хэмжээнд арга зүйч (эрхлэгч) тус, тус нэгтгэж, доор дурдсан үнэлгээ өгнө.

• 76.0 ба түүнээс дээш хувьтай бол “Маш сайн”;
• 51.0-75.0 хувьтай бол “Дунджаас дээгүүр”;
• 26.0-50.0 хувьтай бол “Дундаж”;
• 10.0-25.0 хувьтай бол “Дунджаас доогуур”;
• 0-9.0 хувьтай бол “Анхаарах шаардлагатай”.

2.5.3.жил бүрийн 1, 5 дугаар сард энэ журмын 2.3.2-д заасан баримт, нотолгоонд дүн шинжилгээ хийж, суралцагчийн чадамж (мэдлэг ойлголт, чадвар гүйцэтгэл, төлөвшил)-ийг сургалтын чиглэл тус бүрээр эргэцүүлэн дүгнэлт гаргаж, бүлгийн хэмжээнд нэгтгэх;

2.5.4.энэ журмын 2.5.3-д заасан дүгнэлт, баримт нотолгоонд тулгуурлан тухайн хичээлийн жилийн сургалт, үйл ажиллагааны үр дүнг жил бүрийн 5 дугаар сард багтаан үнэлж, суралцагч, бүлэг, цэцэрлэгийн үнэлгээг цэцэрлэгийн эрхлэгч баталгаажуулан, боловсролын үнэлгээ, арга зүйн байгууллагын цахим системд оруулна.

2.6.Үр дүнгийн үнэлгээний үр дүнд тулгуурлан багш, цэцэрлэгийн удирдах ажилтан эргэцүүлэл хийж, мэргэжлийн багш нарын бүлгээр хэлэлцэн суралцагчийн ялгаатай хэрэгцээг харгалзан сургалт, үйл ажиллагааны төлөвлөлтөд холбогдох тохируулга хийж хэрэгжүүлнэ.

2.7.Суралцагчийн хөгжилд гарсан ахиц өөрчлөлт, хүрсэн үр дүнг тухайн суралцагчийн эцэг эх, асран хамгаалагчдад багш танилцуулж, зөвлөгөө өгч, хамтран ажиллана.

Гурав.Сургуульд бэлтгэгдсэн байдлыг үнэлэх үнэлгээг зохион байгуулах

3.1.Суралцагчийн сургуульд бэлтгэгдсэн байдлыг үнэлэх үнэлгээг боловсролын асуудал эрхэлсэн орон нутгийн байгууллагын даргын тушаалаар томилогдсон ажлын хэсэг зохион байгуулна.

3.1.1.Ажлын хэсгийн бүрэлдэхүүнд цэцэрлэгийн арга зүйч (арга зүйчгүй бол эрхлэгч), багш, эцэг эх, асран хамгаалагчийн төлөөлөл, ерөнхий боловсролын сургуулийн бага боловсрол хариуцсан сургалтын менежер, бага ангийн 1-2 багшийг оролцуулна.

3.2.Сургуульд бэлтгэгдсэн байдлыг үнэлэх үнэлгээнд энэ журмын хавсралтаар баталсан IV түвшний шалгуурыг баримтална.

3.3.Энэ журмын 3.1-д заасан ажлын хэсэг жил бүрийн 05 дугаар сарын 20-ны өдрийн дотор Боловсролын үнэлгээ, арга зүйн байгууллагаас хүргүүлсэн удирдамжийн дагуу сургуульд бэлтгэгдсэн байдлыг үнэлэх үнэлгээг дор дурдсаны дагуу зохион байгуулна.

3.3.1.тухайн жилд ерөнхий боловсролын сургуульд элсэн суралцах хүүхдийг журмын 1.6-д заасан үнэлгээнд бүрэн хамруулах;

3.3.2.үнэлгээг тухайн цэцэрлэгийн сургалт, үйл ажиллагаа тасралтгүй, хэвийн явагдах нөхцөлийг бүрдүүлж, хүүхэд, эцэг эх, асран хамгаалагчдад нэмэлт ачаалал, хүндрэл үүсгэхгүй байхаар зохион байгуулах;

3.3.3. үнэлгээний мэдээллийг тухай бүрд нь  журмын 2.5.4-д заасан цахим системд оруулах;

3.3.4.үнэлгээг зохион байгуулж дууссанаас хойш ажлын 3 хоногийн дотор үнэлгээний ажлын тайланг боловсролын асуудал эрхэлсэн орон нутгийн байгууллагад хүргүүлэх.

3.4.Цэцэрлэгийн эрхлэгч үнэлгээ зохион байгуулах орчин, нөхцөлийг бүрдүүлж, ажлын хэсэгт дэмжлэг үзүүлж ажиллана.

3.5.Боловсролын үнэлгээ, арга зүйн байгууллага энэ журмын 3.1-д заасан  ажлын хэсгийг мэргэжил, арга зүйн нэгдсэн удирдлагаар хангаж ажиллах бөгөөд энэ хүрээнд дараах ажлыг зохион байгуулна.

3.5.1.үнэлгээний даалгаврын санг бүрдүүлж, хөгжүүлэх;

3.5.2.үнэлгээний ажил зохион байгуулах удирдамж, үнэлгээний даалгавар, бусад арга хэрэгслийг жил бүрийн 4 дүгээр сард багтаан боловсролын асуудал эрхэлсэн орон нутгийн байгууллагад цахим хэлбэрээр хүргүүлж, арга зүйгээр хангах сургалт зохион байгуулах;

3.5.3.журмын 2.5.4-д заасан цахим системийн бэлэн байдлыг хангаж, үнэлгээний явцад хэвийн ажиллах нөхцөлийг бүрдүүлэх.

Дөрөв.Үнэлгээний мэдээлэлд дүн шинжилгээ хийх, үр дүнг тайлагнах, ашиглах

4.1.Боловсролын үнэлгээ, арга зүйн байгууллага нь энэ журмын 3.3.3-д заасан мэдээлэлд дүн шинжилгээ хийж, үр дүн, тайланг жил бүрийн 10 дугаар сард багтаан боловсролын асуудал эрхэлсэн төрийн захиргааны төв байгууллага, боловсролын асуудал хариуцсан төрийн захиргааны байгууллага, боловсролын эрдэм шинжилгээ, арга зүйн байгууллагад тус тус хүргүүлнэ.

4.2.Боловсролын эрдэм шинжилгээ, арга зүйн байгууллага нь энэ журмын 4.1-д заасан тайланд үндэслэн сургуулийн өмнөх боловсролын сургалтын хөтөлбөрийн хэрэгжилтэд дүн шинжилгээ хийж, санал, зөвлөмж боловсруулан 11 дүгээр сард багтаан боловсролын асуудал хариуцсан төрийн захиргааны байгууллага, боловсролын асуудал эрхэлсэн орон нутгийн байгууллага, багшийн хөгжлийг дэмжих үндэсний/бүсийн төвд тус, тус хүргүүлнэ.

4.3.Боловсролын асуудал хариуцсан төрийн захиргааны байгууллага дараах ажлыг зохион байгуулна:

4.3.1.энэ журмын 4.2-т заасан зөвлөмжийг хэрэгжүүлэхэд аймаг, нийслэлийн боловсролын газар, дүүргийн боловсролын хэлтсийг мэргэжил, арга зүйн удирдлага зохицуулалтаар хангах;

4.3.2.үндэсний хэмжээнд багшийн мэргэжлийн хөгжлийн хэрэгцээг тодорхойлж, мэргэжил дээшлүүлэх болон мэргэжлийн хөгжлийн үйл ажиллагааны хөтөлбөр, төлөвлөгөөг сайжруулах;

4.3.3.багшийг дадлагажуулах үйл ажиллагааны жишиг хөтөлбөрт суралцагчийн хөгжлийн үнэлгээний талаарх агуулгыг тусган хэрэгжилтэд дэмжлэг үзүүлэх.

4.4.Боловсролын асуудал эрхэлсэн орон нутгийн байгууллага нь дараах ажлыг зохион байгуулна:

4.4.1.тухайн орон нутгийн хэмжээнд суралцагчийн хөгжлийн үр дүнгийн үнэлгээ болон сургуульд бэлтгэгдсэн байдлын үнэлгээний дүнд шинжилгээ хийж, багш, удирдах ажилтны мэргэжлийн хөгжлийн хэрэгцээг тодорхойлж, мэргэжил дээшлүүлэх сургалтын хөтөлбөрийг сайжруулах;

4.4.2.энэ журмын 4.2, 4.3-д заасан байгууллагаас хүргүүлсэн зөвлөмжид үндэслэн багшийн мэргэжлийн хөгжлийн үйл ажиллагаанд арга зүйн дэмжлэг үзүүлж ажиллах;

4.5.Цэцэрлэг нь үнэлгээний үр дүнд тулгуурлан багшийн мэргэжлийн хөгжлийн хэрэгцээ, байгууллагын түвшинд авах арга хэмжээг тус тус тодорхойлж холбогдох арга хэмжээг хэрэгжүүлнэ.

4.6.Суралцагчийн сургуульд бэлтгэгдсэн байдлын үнэлгээний үр дүн, дүгнэлтийг ерөнхий боловсролын сургуулийн анги удирдсан багш энэ журмын 2.4.3-д заасан цахим системээс танилцаж, сургалт, үйл ажиллагаандаа тусган ажиллана.

Тав.Бусад

5.1.Хүүхдийн хувийн хавтас, хөгжлийн үнэлгээгээр цуглуулсан баримт, нотолгоо, холбогдох  материалыг цэцэрлэг төгсөх үед эцэг эх, асран хамгаалагчдад хүлээлгэн өгнө. Эцэг эх, асран хамгаалагч нь уг баримт, мэдээллийг ерөнхий боловсролын сургуулийн бага ангийн багшид танилцуулна.

5.2.Суралцагчийн үр дүнгийн болон сургуульд бэлтгэгдсэн байдлын үнэлгээний гүйцэтгэлийн хувиар илэрхийлсэн дүнг суралцагч, эцэг эх, асран хамгаалагчдад мэдээлэхгүй, зөвхөн үнэлгээний мэдээлэл боловсруулах, суралцагчийн хөгжлийн хэрэгцээг тодорхойлох, дүгнэлт гаргахад ашиглана.

5.3.Нутгийн өөрөө удирдах болон захиргааны байгууллага, төрийн бус болон иргэний нийгмийн байгууллагаас боловсролын асуудал эрхэлсэн төрийн захиргааны төв байгууллага, эцэг эх, асран хамгаалагч, харгалзан дэмжигчийн зөвшөөрөлгүйгээр хүүхдийн хөгжлийг үнэлэх аливаа шалгалт, судалгаа авахыг хориглоно.

5.4.Үнэлгээ нь зөвхөн хүүхдийн хөгжлийг дэмжих зорилгоор хийгддэг тул үнэлгээний үр дүнд үндэслэн тэдний эрхийг хязгаарлах, ялгаварлан гадуурхах үндэслэл болохгүй.

Сургуулийн өмнөх боловсролын үйлчилгээнд

хамрагдаж байгаа суралцагчийн хөгжил болон сургуульд

бэлтгэгдсэн байдлыг үнэлэх журмын хавсралт

СУРАЛЦАГЧИЙН ХӨГЖЛИЙН ҮНЭЛГЭЭНИЙ ШАЛГУУР

СУРАЛЦАГЧИЙН ХӨГЖЛИЙН ҮНЭЛГЭЭНИЙ ШАЛГУУР

СУРАЛЦАГЧИЙН ХӨГЖЛИЙН ҮНЭЛГЭЭНИЙ ШАЛГУУР

СУРАЛЦАГЧИЙН ХӨГЖЛИЙН ҮНЭЛГЭЭНИЙ ШАЛГУУР

✦ ✦ ✦